13014: कर्तरि कर्मव्यतिहारे

Padacheda: कर्तरि | S | 7 | 1 |

कर्म-व्यतिहारे | S | 7 | 1 |

Sutrartha

क्रियायाः व्यतिहारे कर्तरि प्रयोगे अपि धातोः आत्मनेपदस्य प्रत्ययाः विधीयन्ते ।

किं नाम व्यतिहारः? अस्य शब्दस्य अर्थद्वयम् विद्यते - [1] एकस्य कार्यम् यदा कश्चन अन्यः करोति, तदा तस्य ‘व्यतिहार’ इति संज्ञा भवति । When the duty of one person is carried out by another, we refer to it as व्यतिहार. [2] द्वौ मनुष्यौ परस्परयोः समानम् व्यवहारम् यदा कुरुतः, तदा अपि तस्य ‘व्यतिहार’ इति संज्ञा भवति । When two people do the same action against each other, that is also referred as व्यतिहार. उभयप्रकारयोः व्यतिहारं दर्शयितुम् वर्तमानसूत्रेण कर्तरि प्रयोगे अपि आत्मनेपदस्यैव प्रयोगः भवति । यथा - [अ] वृक्षच्छेदनकार्यम् वस्तुतः शूद्रस्य अस्ति, परन्तु यदि ब्राह्मणः तत् कार्यं करोति, तर्हि अयम् ‘व्यतिहारः’ अस्तीति उच्यते, तदर्थम् च आत्मनेपदम् प्रयुज्यते । यथा - ब्राह्मणः वृक्षं व्यतिलुनीते । [आ] द्वौ राजानौ परस्परयोः प्रहारं कुरुतः चेत् अत्रापि व्यतिहारः दृश्यते, अतः अत्रापि क्रियां द्योतयितुमात्मनेपदं प्रयुज्यते । यथा - राजानौ सम्प्रहरेते । राजानः सम्प्रहरन्ते । ज्ञातव्यम् - अस्मिन् सूत्रे ‘कर्म’ शब्दः कारकार्थे प्रयुक्तः नास्ति, ‘क्रिया’ अस्मिन् अर्थे प्रयुक्तः अस्ति । कर्मव्यतिहार इत्युक्ते क्रियायाः व्यतिहारः ।

Sutrartha (English)

A verb gets the प्रत्ययाः of आत्मनेपद, even in the कर्तरि प्रयोग, in the context of व्यतिहार (exchange of actions).

Vasu English Summary

In denoting the agent, when reciprocity of action is to be expressed, the affixes of the आत्मनेपद are employed.

Vasu English Translation

In denoting the agent, when reciprocity of action is to be expressed, the affixes of the आत्मनेपद are employed. The active or कर्तृवाच्य verbs when denoting reciprocal action are atmanepadi. As, व्यतिपचन्ते, ‘they cook for each other,’ व्यतिलुनते ‘he performs cutting of wood which was the appropriate office of another.’

The words “reciprocity or interchange of action” of this sutra govern and are understood in the two following sutras also.

The word karma in the sutra means action and not the technical ‘karma’ meaning ‘object’ and the word vyatihara means reciprocity or interchange. When an action which was appropriate to one person is performed by another, whose duty it was not, that is called ‘interchange of action.’ When such interchange is not meant Paras. is used. As लुनन्ति ‘they cut.’ The word kartari here is used for the sake of the subsequent aphorism (1.3.78), which see.

Bhashya

कर्तरि कर्मव्यतिहारे क्रियाव्यतिहारे ॥1 ॥ क्रियाव्यतिहार इति वक्तव्यम्। कर्मव्यतिहार इत्युच्यमाने इहापि प्रसज्येत - देवदत्तस्य धान्यं व्यतिलुनन्तीति, इह च न स्यात् - व्यतिलुनते व्यतिपुनते इति। तत्तर्हि वक्तव्यम्? न वक्तव्यम्। क्रियां हि लोके कर्मेत्युपचरन्ति। कां क्रियां करिष्यसि, किं कर्म करिष्यसि इति। एवमपि कर्तव्यम्। कृत्रिमाकृत्रिमयोः कृत्रिमे संप्रत्ययो भवति। क्रियापि कृत्रिमं कर्म। न सिद्ध्यति। कर्तुरीप्सिततमं कर्म इत्युच्यते। कथं च क्रिया नाम क्रियया इर्प्सिततमा स्यात्?। क्रियापि क्रिययेप्सिततमा भवति। कया क्रियया? संपश्यतिक्रियया प्रार्थयतिक्रियया अध्यवस्यतिक्रियया (च)। इह य एष मनुष्यः प्रेक्षापूर्वकारी भवति स बुद्ध्या तावत्कंचिदर्थं संपश्यति, संदृष्टे प्रार्थना, प्रार्थितेऽध्यवसायः, अध्यवसाये आरम्भः, आरम्भे निर्वृत्तिः, र्निर्वृत्तौ फलावाप्तिः। एवं क्रियापि कृत्रिमं कर्म। एवमप्युभयोः कृत्रिमयोरुभयगतिः प्रसज्येत। तस्मात्क्रियाव्यतिहार इति वक्तव्यम्। न वक्तव्यम्। इह कर्तरि व्यतिहारे इतीयता सिद्धम्। सोऽयमेवं सिद्धे सति यत्कर्मग्रहणं करोति तस्यैतत्प्रयोजनम् - क्रियाव्यतिहारे यथा स्यात्कर्मव्यतिहारे मा भूदिति। अथ कर्तृग्रहणं किमर्थम्? कर्मव्यतिहारादिषु कर्तृग्रहणं भावकर्मनिवृत्त्यर्थम् ॥ 2 ॥ कर्मव्यतिहारादिषु कर्तृग्रहणं क्रियते, भावकर्मणोरनेनात्मनेपदं मा भूदिति। इतरथा हि तत्र प्रतिषेधे भावकर्मणोः प्रतिषेधः ॥ अक्रियमाणे कर्तृग्रहणे भावकर्मणोरप्यात्म्यनेपदमनेन प्रसज्येत। तत्र को दोषः? तत्र प्रतिषेधे भावकर्मणोः प्रतिषेधः। तत्र प्रतिषेधे भावकर्मणोरप्यनेनात्मनेपदस्य प्रतिषेधः प्रसज्येत - व्यतिगम्यन्ते ग्रामाः, व्यतिहन्यन्ते दस्यवः इति। न वानन्तरस्य प्रतिषेधात् ॥ 3 ॥ न वा एष दोषः। किं कारणम्? अनन्तरस्य प्रतिषेधात्। अनन्तरं यदात्मनेपदविधानं तस्य प्रतिषेधात्। कुत एतत्? अनन्तरस्य विधिर्वा भवति प्रतिषेधो वा इति। पूर्वा प्राप्तिरप्रतिषिद्धा तया भविष्यति। ननु चेयं प्राप्तिः पूर्वां प्राप्तिं बाधते। नोत्सहते प्रतिषिद्धा सती बाधितुम्। उत्तरार्थं तर्हि कर्तृग्रहणं कर्तव्यम्। न कर्तव्यम्। क्रियते तत्रैव शेषात्कर्तरि परस्मैपदम् इति। द्वितीयं कर्तृग्रहणं कर्तव्यम्। किं प्रयोजनम्? कर्तैव यः कर्ता तत्र यथा स्यात्, कर्ता चान्यश्च यः कर्ता तत्र मा भूदिति। ॥ 14 ॥

Kashika

कर्मशब्दः क्रियावाची। व्यतिहारो विनिमयः। यत्रान्यसंबन्धिनीं क्रियामन्यः करोति, इतरसंबन्धिनीं चेतरः, स कर्मव्यतिहारः। तद्विशिष्टक्रियावचनाद् धातोरात्मनेपदं भवति। व्यतिलुनते। व्यतिपुनते। कर्मव्यतिहार इति किम्? लुनन्ति। कर्तृग्रहणमुत्तरार्थं शेषात् कर्तरि परस्मैपदम् (१.३.७८) इति॥

Siddhanta Kaumudi

क्रियाविनिमये द्योत्ये कर्तर्यात्मनेपदं स्यात् । व्यतिलुनीते । अन्यस्य योग्यं लवनं करोतीत्यर्थः ॥ श्नसोरल्लोपः-(SK2469) । व्यतिस्ते । व्यतिषाते । व्यतिषते । तासस्त्योः -(SK2191) इति सलोपः । व्यतिसे । धि च -(SK2241) । व्यतिध्वे । ह एति -(SK2250) । व्यतिहे । व्यत्यसै । व्यतिषीत् । व्यत्यास्त । व्यतिराते । व्यतिराते । व्यतिराते । व्यतिभाते । व्यतिभाते । व्यतिभाते । व्यतिबभे ॥

Laghu Siddhanta Kaumudi

क्रियाविनिमये द्योत्ये कर्तर्यात्मनेपदम्। व्यतिलुनीते। अन्यस्य योग्यं लवनं करोतीत्यर्थः॥

Balamanorama

कर्त्तरि कर्मव्यतिहारे - कर्तरि कर्म । कर्मव्यतिहारशब्दं विवृण्वन्नाह — क्रियाविनिमये द्योत्ये इति । एवं च कर्मशब्दः क्रियापरः, व्यतिहारशब्दो विनिमयपर इत्युक्तं भवति । अन्यस्येति । शूद्रादियोग्यं सस्यादिलवनं ब्राआहृणः करोतीत्यर्थः । परस्परकरणमपि कर्मव्यतिहार इति कैयटः । संप्रहरन्ते राजानः । कर्तृग्रहणं भावकर्मणोरित्यस्याऽनुवृत्तिनिवृत्त्यर्थम् ।अन्यथा व्यतिलुनीत इत्यत्र न स्यात् । वस्तुतस्तु पृथक् सूत्रारम्भादेव सिद्धे कर्तृग्रहणमुत्तरार्थमिति भाष्ये स्पष्टम् । व्यति अस् ते इति स्थिते आह — श्नसोरिति । तपसे अयोग्यः शूद्रस्तपस्वी भवतीत्यर्थः । इहउपसर्गप्रादुभ्र्या॑मिति न षः, यच्परकत्वाऽभावादिति भावः । व्यतिषाते इति । इह अच्परकत्वादुपसर्गप्रादुभ्र्यामिति षः । व्यति स् से इति स्थिते आह — तासस्त्योरिति ।उपसर्गप्रादुभ्र्या॑मिति नेह ष्टवम्, अस्त्यवयवस्य सकारस्य लुप्तत्वात् । व्यति स् ध्वे इति स्थिते आह — धि चेति । ‘सलोप’ इति शेषः । व्यितस् ए इति स्थिते आह — ह एतीति । सकारस्य हकार इति भावः । व्यत्यसै इति । लोडुत्तमपुरुषैकवचनम् । व्यत्यास्तेति । लङि रूपम् । व्यतिषीतेति । लिङि रूपम् । व्यतिराते इति । लटि प्रथमपुरुषैकद्विबहुवचनेषु समानमेव र#ऊपम् । व्यतिभाते इति । भाधातो रूपम् । व्यतिबभे इति । लिटि रूपम् ।

Tattvabodhini

कर्त्तरि कर्मव्यतिहारे - कर्तरि कर्म । अन्यस्येति । शूद्रस्य योग्यं सस्यादिलवनं ब्राआहृणः करोतीत्यर्थः । परस्परकरणमपि कर्मव्यतिहारः । संप्रहरन्ते राजानः । पृथक्सूत्रारम्भादेव सिद्धे कर्तृग्रहणमुत्तरार्थम् । व्यतिस्ते इति । यच्परत्वाऽभावान्न षः । व्यतिसे इति ।उपसर्गप्रादुभ्र्या॑मिति नेह षत्वम्, सकारस्याऽस्त्यवयवत्वाऽभावात् ।आदेशप्रत्यययो॑ रिति षत्वं तुसात्पदाद्यो॑रिति निषिद्धम्, एकदेशविकृतन्यायेन प्रत्ययमात्रस्य पदत्वात् ।

Padamanjari

अत्र लौकिकं कर्म गृह्यते, न पारिभाषिकमित्याह-कर्मशब्दः क्रियावाचीति। ननु कृत्रिमत्वात्पारिभाषिकस्यैव ग्रहणं युक्तं ततो देवदतस्य धान्यं व्यतिलुनन्तीत्यत्रैव स्यात्, एवं मन्यते-इह’कर्तरि व्यतीहारे’ इतीयता सिद्धं, करणादिव्यतीहारे कस्मान्न भवति, उच्यते;क्रियायाः साध्यत्वात् प्राधान्यं क्रिययाप्तुमिष्टतमत्वातादर्थ्येते;तद्यदि साधनं कर्म गृह्यएत, तदा क्रियाया अपि संदर्शनप्रार्थनाध्यवसायैराप्यमानत्वात् कृत्रिमकर्मत्वमिति पुनरुभयोरपि ग्रहणात् कर्मग्रहणमनर्थकं स्यात्। किं चात्मनेपदेनाक्षिप्तोऽनुवृतो वा धातुः कर्मव्यतिहारेण विशेष्यते-तत्र वर्तमानाद्धातोरिति, न च साधनकर्मणि धातोर्वृत्तिः सम्भवति, तस्य क्रियावाचित्वादिति। विनिमयो व्यत्यास इत्यर्थः। एतदेव स्पष्टयति-यत्रेति। योग्यतावशादस्येदं साधनम्, अस्येयं क्रिया साध्येति निर्ज्ञातयोर्विपर्यासः साध्यसाधनभावस्य स व्यतीहार इति विवक्षितम्। यत्रेत्युपक्रमातु स व्यतीहारस्य विषयो विवक्षित इत्यर्थः। परस्परकरणमपि कर्मव्यतीहार उच्यते-संप्रहरन्ते राजानः, व्यात्युक्षीमभिसरणग्लहामदीब्यन्निति। व्यतिलुनत इति ।’लुञ् छेदने’ ठात्मनेपदेष्वनतःऽइत्यदादेशः,’श्नाभ्यस्तयोः’ इत्याकारलोपः,’प्वादीनां ह्रस्वः’ । अन्योन्ययोग्यमन्योन्यविषये वा लवनं कुर्वन्तीत्यर्थः । एवंरूपश्चार्थोऽनेककर्तृकत्वे सति प्रतीयत इत्येकवचनं न भवतीति केचिदाहुः। व्यत्यसे, व्यतिहे इत्येकवचनमपि तत्र तत्रोदाहरिष्यते। ठन्यो व्यतिस्ते तु ममापि धर्मःऽ इति भट्टिप्रयोगः। कर्मव्यतीहार इति किमिति । कर्तृग्रहणमेव व्यतिलुनत इत्यादौ प्रापकत्वेनोपयोक्ष्यत इति भावः। अथ कर्तृग्रहणं किमर्थम् ? भावकर्मनिवृत्यर्थं न वा पूर्वेण भावाद्। भावकर्मणोर्हि पूर्वेणात्मनेपदं भवत्येव - व्यतिलूयते व्यतिपूयत् इति, तेन यथा स्याद्, अनेन मा मूत्, कः पुनरत्र विशेषः ? तेन वा स्यादनेन वा ? अयमस्ति विशेषः-अनेन सति’न गतिहिसार्थेभ्यः’ इति प्रतिषेधः प्राप्नोति - व्यतिगम्यते ग्रामः, व्यतिहन्यन्ते दस्यव इति। न वानन्तरस्य प्रतिषेधाद् व्यतिहन्यत इत्यत्र द्वे प्राप्ती -‘भावकर्मणोः’ इति च । तथा ठनन्तरस्य विधिर्भवति प्रतिषेधो वाऽइति अनन्तरा कर्मव्यतीहारलक्षण प्राप्तिः प्रतिषिध्यते, पूर्वा तु भविष्यति, नार्थं एतेन कर्तृग्रहणेनत्यत आह - कर्तृग्रहणमिति।’शेषात्कर्तरि’ इति प्रदर्शनमेतद् । ठाङे दोऽनास्यविरहणोऽइत्यादावप्यस्योपयोगं वक्ष्यामः॥

Nyaas

कर्मशब्दः क्रियावाची इति। एतेन लौकिकमिह कर्म क्रियात्मकं गृह्रते, न पारिभाषिकमिति दर्शयति। कुत एतल्लभ्यते? प्रत्यासत्तेः। क्रिया हि धातोः प्रत्यासन्ना, तत्र साक्षाद्वृत्तेः। साक्षाद्वृत्तिस्तु धातुवाच्यत्वात् क्रियायाः। पारिभाषिके तु साधनात्मके कर्मणि धातुः साक्षान्न वर्तते;तस्याधातुवाच्यत्वात्। तस्माद्धातुं प्रतिन तस्य प्रत्यासत्तिरिति न गृह्रते, तेन साधनकर्मव्यतीहारे न भवत्यात्मनेपदम् - देवदत्तस्य धान्यं व्यतिलुनन्तीति। लुनातिरुपसंगर्हार्थे लवने वर्तते। देवदत्तेन यद्धान्यं सङगृहीतं पुरस्ताल्लवनेनोपसंगृह्णन्तीत्यर्थः। ततश्चान्यसम्बन्धिनो धानयस्यान्येन संग्रहणाद्भवति साधनकर्मव्यतीहारः। अन्यसम्बन्धिनीम् इति। अन्यस्य कर्त्तुरभीष्टया क्रियेमां क्रियां करिष्यामीति सेहान्यसम्बन्धिन्यभिप्रेता, अन्यथा यद्यन्येन निष्पादिता या क्रिया सेहान्यसम्बन्धिन्यभिप्रेता स्यात् तदा व्यतिहारो नोपपद्येत, न ह्रन्येन निष्पादितायाः पुनर्निष्पादनमुपपद्यते। व्यतिलुनते इति। आत्मनेपदेष्वनतः (7.1.5) इत्यदादेशः, श्नाभ्यस्तयोरातः (6.4.112) इत्याकारलोपः। अथ कर्तृग्रहणं किमर्थम्? भावकर्मनिवृत्त्यर्थमिति चेत्, न; अभीष्टत्वाद्भावकर्मणोरात्मनेपदम् - व्यतिभूयते सेनया, व्यतिगम्यन्ते ग्रामाः, व्यतिहन्यन्ते दस्यव इति। भावकर्मणोः (1.3.13) इत्यनेनैव यथा स्यात्, अनेन मा भूदित्येवमर्थमिति चेत्, न; विशेषाभावात्। न हि तेनात्मनेपदे सत्यनेन वा कश्चिद्विशेषोऽस्ति। यद्यनेन स्यात् तदा न गतिहिंसार्थेभ्यः (1.3.15) इति प्रतिषेधः स्यात्, तेन चात्मनेपदे विधीयमाने न भवत्येष दोष इति चेत्, सत्यम्; एषोऽस्तु विशेषः,तथापि न कर्त्तृग्रहणं कर्तव्यम्; यस्मात् अनन्तरस्य विधिर्वा भवति प्रतिषेधो वा (व्या।प।19) इत्यनन्तरा या प्राप्तिः सा प्रतिषिध्यते, न पूर्वा। तेन भावकर्मणोरात्मनेपदं भविष्यति। अत आह - कर्त्तृग्रहणमुत्तरार्थम् इति। कः पुनरसावुत्तरो योगो यत्रास्य प्रयोजनमित्याह - शेषात् इत्यादि॥

Prakriyasarvasvam

अस्मिन्नर्थे कर्तर्यप्यात्मनेपदं स्यात् । <karika>व्यत्यासेन क्रिया तद्वदन्योन्यसदृशी क्रिया । अन्योन्यविषया चेति क्रियाविनिमयस्त्रिधा ॥ ६४६ ॥ व्यत्याचरेते विप्रान्यौ व्यतिभाते दृशोर्द्वयम् । व्यत्युक्षेते कुमारावित्युदाहार्यं त्रयं क्रमात् ॥ ६४७ ॥</karika>

Sudha

कर्तरि कर्मेति । कर्मव्यतिहार इत्यत्र कर्मशब्दः क्रियापरः, व्यतिहारशब्दो विनिमयपर इत्युक्तं भवति । व्यतिलुनीते । वि अति इति उपसर्गद्वयपूर्वकलूञधातोः **वर्तमाने लट्**(3.2.123) इति लटि, अनुबन्धलोपे, लटो लः स्थाने **कर्तरि कर्मव्यतिहारे**(1.3.14) इति कर्मव्यतिहारे द्योत्ये कर्तरि आत्मनेपदे प्राप्ते, तत्र प्रथमपुरुषैकवचनविवक्षायां ते कृते, **क्र्यादिभ्यः श्ना**(3.1.81) इति श्नाप्रत्यये अनुबन्धलोपे, उभयत्र सार्वधातुकसंज्ञायां **प्वादीनां ह्रस्वः**(7.3.80) इति लुञो ह्रस्वत्वे, **ई हल्यघोः**(6.4.113) इति श्नाआकारस्य ईत्वे, **टित आत्मनेपदानां टेरे**(3.4.79) इति टेरेत्वे ‘वि अति’ इत्यत्र यणि च कृते ‘व्यतिलुनीते’ इति रूपम् । अन्यस्येति । शूद्रादियोग्यं सस्यादिलवनं ब्राह्मणः करोतीत्यर्थः ।

Sutra Prayogas

• व्यतिस्ते (भट्टिकाव्यम्): अस्तेः कर्मव्यतिहारे इति तङ्।

• व्यत्यतन्वातां (भट्टिकाव्यम्): कर्तरि कर्मव्यतिहारे इत्यात्मनेपदम्।